रत्नागिरी : रत्नागिरी पोलिसांतर्फे नऊ नोव्हेंबर २०१९ रोजी रत्नागिरी पोलीस कोस्टल मॅरेथॉनचे आयोजन करण्यात आले आहे. स्पर्धेतील सहभागासाठी ऑनलाइन नोंदणी करण्यासाठी सहा नोव्हेंबर ही अंतिम मुदत असून, जास्तीत जास्त रत्नागिरीकरांनी या मॅरेथॉनमध्ये सहभागी व्हावे, असे आवाहन जिल्हा पोलीस अधीक्षक डॉ. प्रवीण मुंढे यांनी केले आहे.
सकाळी सहा वाजता मारुती मंदिर सर्कलपासून मॅरेथॉनची सुरुवात होणार असून, जयस्तंभामार्गे भाट्ये किनारा, पावस रस्ता आणि तेथून परत मारुती मंदिर येथील शिवाजी स्टेडियम असा मॅरेथॉनचा मार्ग आहे.
सामाजिक एकात्मता वाढीला लागण्यासाठी आणि आरोग्यपूर्णतेचा संदेश देण्यासाठी या मॅरेथॉनचे आयोजन करण्यात आले आहे. ‘रत्नागिरीकर या नात्याने आपण नेहमीच सर्व जाती, धर्म किंवा प्रत्येक भाषेच्या समुदायामध्ये एकत्र उभे राहिलो आहोत. रत्नागिरी पोलीस कोस्टल मॅरेथॉनमध्ये सर्वांनी भाग घेवून, सर्व प्रकारच्या वाईट गोष्टींविरुद्ध आपली एकता दाखवू या, तंदुरुस्त राहण्यासाठीचा संदेश देऊ या. नागरिकांचा पोलिसांच्या कार्यात सहभाग वाढावा, पोलीस आणि सर्वसामान्य नागरिक यांच्यात समन्वय राहावा यासाठीच या मोठ्या मॅरेथॉनचे आयोजन करण्यात आले आहे. रत्नागिरीकरांनी यात सहभागी व्हावे,’ असे आवाहन रत्नागिरी जिल्हा पोलीस अधिक्षक डॉ. प्रवीण मुंढे यांनी केले आहे.
अधिक माहितीसाठी संपर्क :
पोलीस निरीक्षक अनिल विभूते : ८८०५० ०८०८०
पोलीस निरीक्षक नितीन ढेरे : ९०११९ ९५७७७
महेश गर्दे, जाणीव फाउंडेशन : ९४९२२ ००३१२८